NG Audio - Erebus 厄瑞玻斯
睇到份Erebus份規格表，第一反應可以好代表到NG Audio嘅厲害之處。
「玩咁大？」
Erebus 厄瑞玻斯
NG Audio係本地便攜音響壇能夠咁快冒起，可能都正因為佢「玩得夠大」，近期印象最深刻嘅產品，必定係用左平板單元做中高頻嘅大力神Heracles。上次同呢對耳機做左個評測之後，雖然食推力，對前端有返啲要求，但個人係非常滿意對機，配搭下前端都有排你「玩」。
不難留意到NG Audio對新技術、新結構都係來者不拒，佢地嘅新產品，亦每每能夠為發燒友（包括我）帶來新意。今次最強旗艦 厄瑞玻斯Erebus，都唔例外。
以希臘神話中，陰陽兩界的交界處 厄瑞玻斯為名，除左係NG Audio新耳機系列嘅命名方式，其實同佢嘅聲音表現有好大關係。但最令人嘖嘖稱奇嘅，就係喺佢純黑色嘅巨型腔體內，放置左高達15顆單元嘅聲學架構。
3D打印聲學腔體
NG Audio耳機比較肥仔，加上個純黑腔體，外觀上已經慢慢變成左一個signature了。以聲學科技公司起家，NG Audio對聲音嘅研究，不下於眾多音響廠商或發燒友，亦因為公司早有規模、資源，創始人吳辰龍先生係早期已經著手以3D打印技術設計耳機聲學結構：你睇近期推出嘅NG Audio耳機，每一款都針對發聲單元結構，設計左專屬嘅內部聲學室。
3D打印嘅好處係，能夠做到每一個腔體嘅尺寸、結構幾乎一模一樣之外，亦可以針對每一個發聲單元嘅擺位，導音管長度等，做一個預演，先一步得知聲音嘅變化，可以話係近代入耳式耳機設計中，最重要嘅突破。
係Erebus上，3D打印更係必要之舉，因為呢款耳機首度採用左8靜電單元嘅超高音佈局，配埋6粒動鐵同一粒9.2mm加強磁體單元，豪華配置，對於聲學結構嘅強化，當然唔惹小。
由出音導管處可見，Erebus分開左四部份嘅輸出，外圈有明顯3D打印痕跡，而管道係深入腔體嘅，接駁住唔同嘅發聲單元，形成最直接嘅傳聲環境。個8粒靜電單元，好大機會係經由最粗嘅出音導管發聲。
腔體本身嘅構造亦有適當強化。點解NG Audio耳機個個都係肥仔？上官網睇一睇Erebus未裝面板時嘅product shot，你會見到個腔體真係好厚身！耐久度一定係高嘅，同時又會更加隔音，聽到多啲細節。
肥得來，其實佢都非常好戴架！
8靜電單元，專屬遮罩塗層
呢個部份，就係NG Audio嘅精工所在。
係Erebus嘅研發過程中，設計師無意中發現到，靜電單元所接駁嘅變壓器會受磁場影響，導致靜電單元聲壓產生波動。而對於Erebus一個咁緊湊嘅聲學佈局而言，影響就更加嚴重了。
於是乎，NG Audio運用左一種特殊嘅屏蔽遮罩材質，將其塗抺係靜電單元嘅變壓器同單元表面，就好似一個保護罩咁，消除磁場嘅影響。
一粒靜電單元，大小同粒紅豆係差不多的，而Erebus所使用嘅推挽式靜電單元，都講緊每邊會有兩組變壓器同四粒「紅豆」需要處理，人手塗喎！再加上裝嵌，擺位，加工難度絕對係歷代之冠。
而大家實際眼見嘅耳機腔體，其實都係由呢一種遮罩材質製作而成。NG Audio對於聲音嘅追求，真係令人佩服佩服。
旗艦級配套
賣到呢個價錢，姑勿論係米值得投資，但配件嘅等級就好睇到廠方是否有誠意。
老實講，開箱之後，當見到包裝附送個條黑色線材，可能你嘅熱情會立即減小，不過，不過，先等你插埋條線，等佢開下聲聽下先，或者你嘅睇法就會有唔同。試過用兩三條唔同嘅線材搭Erebus，我都會不期然插返呢條OFC耳機，因為個配合度都幾高，幾夾Erebus嘅個種全面聽感。
另外仲有個質感好好嘅啡色瘋馬皮便攜盒，內裝夠闊，但我會唔想用，寧願儲起佢。
話時話，今次Erebus嘅開箱體驗幾好，打開盒蓋，入面嘅compartment合好似搭𨋢咁升上來，都幾型架！配埋對耳機嘅手工、外觀，無時無刻都表明佢旗艦級嘅身份。
8靜電單元，高音突破天際？咁又未必。
高音嘅表現，係從容、寬闊嘅，好似有一大塊柔光布阻擋太陽咁，亮度好夠，但唔刺眼，亦都唔係一味「銳」落來；延伸豐富，多到連鈸聲嘅顫音都會聽到，而且靜電單元疊加之下，高音無乜「碎」，密度又高，換來每一下嘅聲音響起，都係自然而來，自然而去，attack同衰減都好線性，發揮到靜電單元聲音上嘅獨特性，塑造左一個超高樓底嘅廳堂出來。
低音飽滿，質感表現依然係動圈嘅優勢來，而Erebus呢粒圈，唔屬於力度型，attack不算強，但勝在速度感不錯，有一浸浸的超低頻做托底，成個空間有深度，結合埋高音個種滑滑嘅質感，多野聽之餘，可以聽好耐！
中頻，或者應該話由低音至高音嘅呢段「過渡」，做得非常靚，非常順暢，唔會話一言不合就有啲野無左，負責中頻嘅2粒動鐵同負責中高頻嘅4粒動鐵，功不可沒。聽感上，主角嘅形態聚焦，強弱聲對比足，口型實在，密度依然強烈，同其他高階耳機嘅最大分別，係佢嘅動態範圍真係好闊，任你背後樂器點爆，企係前面嘅人聲都係清晰有力！聽live 好有感覺！
整體嘅聲效，有種好似睇緊IMAX嘅個種full得來色彩鮮艷嘅畫像般，立體得來，黑白深淺過渡順到一個點。呢種玩法，其實真係交響樂嘅能手來。
後記：揀啱耳膠的重要性
Erebus嘅耳導管設計有啲特殊，粗得來，每條出音導管嘅排列都比較靠邊，亦都有小小號角管咁嘅內嵌設計，所以耳膠不太能揀管道比較窄嘅，一來好難裝上去耳機，二來聲會變得較狹窄，無辦法發揮到Erebus個種闊。
原裝膠嘅形狀係完全適合架，只係因為林質太軟，戴上耳後會塌，係我耳中隔音都比較差，無左個低音，聲拉薄左，又係會無曬Erebus嘅特性。不過據我所知，有朋友係用原裝膠都完全無問題的，睇你同隻膠夾唔夾啦！
至於聲音，可能你會話Erebus無咩特色，又無好亮麗嘅高音表現，又無結結實實嘅低音音效，但同佢相處左個幾星期之後，再聽返其他耳機，你就會有種小左啲野嘅感覺：Ereubs個種均衡、細水長流，同埋全面性，唔係好多耳機可以做得到，仲做得咁好。係嘅，佢無咩「搶耳」嘅效果，但勝在所有野都活靈活現，夠曬舒適，所以佢同而家嘅市場有啲背道而馳，但亦不減佢聲音上嘅藝術造詣。
產品規格
設計
15 單元 4 分頻、4 路分音設計
單元
低頻（動圈）x1、中頻（動鐵）x4、中高頻（動鐵）x2、高頻（靜電）x8
頻率響應
5 ~ 70000 Hz
靈敏度
104 db SPL@1mW
阻抗
17Ω
隔音效果
26db
建議零售價: HK$35,999.00
Sponsored by DIGIBRAVE
[Facebook Group] : [WEM 本地耳機及音響交流區]
[MEWE Group] : [WEM 本地耳機及音響交流區]
[Facebook 專頁] : Facebook WEM Media
[WEM Media 網頁] : WEM Media
